Өскемен қаласындағы № 2 соттың баспасөз қызметінің мәліметінше, есепшілер 7 жыл бойы бюджет қаражатын заңсыз жымқырған.
"2017-2024 жылдар аралығында бас есепші мен оның әріптесі сөз байласып әрекет еткен. Олар өздерінің қызметтік бабын пайдаланып, шоттарына жүйелі түрде ақша аударып, мемлекетке зиян келтірген", – деп түсіндірді баспасөз қызметі.
Сот анықтағандай, жалпы шығын 144 622 868 теңгені құраған. Ақша білім беру жүйесіне тиесілі және мектеп қажетіне жұмсалуы тиіс еді.
Сот отырысында 2 әйел де өз кінәсін мойындап, өкінетіндерін жеткізген. Бұл үкім шығару кезінде ескерілді.
"Сот оларды 7 жылға бас бостандығынан айырды. Сонымен қатар, 2 сотталушы да келтірілген зиянды толық өтеуі қажет", – деп түсіндірді соттың баспасөз қызметі.
Екі әйелдің материалдық жауапкершілікке байланысты лауазымдарды атқаруына өмір бойына тыйым салынды.
