Сауда және интеграция министрі Бақыт Сұлтановтың сөзінше, келісім елімізде әзірленген стандарттық үлгілерді келісімге қатысушы елдерде қосымша сынақ рәсімін жүргізусіз тануға мүмкіндік береді.
"Қазақстан Республикасында стандарттық үлгі өндіріліп, сынақтан және үлгінің типін бекітуден өтсе, келісімге қатысушы басқа елдер қосымша сынақсыз техникалық құжаттаманың сараптама нәтижесін мойындайды", – деді министр.
Оның түсіндіруінше, заң жобасы метрология саласындағы өлшеу нәтижелеріне деген сенімді арттырып, өнімнің сапасы мен қауіпсіздігін қамтамасыз етеді.
"Мемлекетаралық стандарттық үлгілер экономиканың түрлі салаларында сұранысқа ие және кеңінен қолданылады. "Ұлттық тізілімде 634 стандарттық үлгі тіркелген. Оның ішінде 337-сі мемлекетаралық стандарттық үлгілер тізіліміне енгізілген. Биыл Стандарттау және метрология институты 163 стандарттық үлгіні әзірлеп, мемлекетаралық стандарттық үлгі тізіліміне қосты", – деді Бақыт Сұлтанов.
Қанат Махамбет
