Экология, геология және табиғи ресурстар министрі Мағзұм Мырзағалиев үкімет отырысында геологиялық барлаудың 2021-2025 жылдарға арналған мемлекеттік бағдарламасын жүзеге асыруға республикалық бюджеттен 200 млрд теңге ақша жұмсалатынын мәлімдеді. Оның айтуынша, бұл ақша еселеніп қайтады.
"Болжам бойынша, қазынадан бөлінген 1 теңге 4 теңге пайда әкелуге тиіс. 200 млрд теңге 800 млрд теңге болып қайтады", – деді Мағзұм Мырзағалиев.
Министрдің мәлімдеуінше, мемлекеттік бағдарлама арқылы пайдалы қазбалардың болжамды ресурстарының өсімі қамтамасыз етіліп, геология ғылымын дамытуға басымдық беріледі. Бұл іске сала ардагерлері, геолог-ғалымдар және ғылыми-зерттеу институттарының қызметкерлері жұмылдырылады.
"2025 жылдың соңына қарай экономиканың бірнеше саласында мультипликативтік әсері бар бірқатар оң нәтижеге қол жеткізіледі", – деді Мағзұм Мырзағалиев.
Қанат Махамбет
