ІІМ Тергеу департаментінің басшысы Санжар Әділов өткен жылы қаржы пирамидасын ұйымдастырғаны үшін қанша алаяқ сотталғанын айтты, деп хабарлайды inbusiness.kz тілшісі.
"2021 жылы (қаржы пирамидасын ұйымдастырғаны үшін – автор) 126 адам қылмыстық жауапкершілікке тартылды. Оның 38-і әртүрлі мерзімге бас бостандығынан айырылды. Қалған күдіктілер соттың алдында жауап беріп жатыр. Сот әділ үкім шығарады деген үміттеміз", – деді Санжар Әділов ІІМ-де баспасөз мәслихатында.
Оның айтуынша, сотталған 22 адам 3-5 жылға, 11 адам 5-8 жылға, 1 адам 3 жылға бас бостандығынан айырылған, әрі 4 адамның жазасын өтеу мерзімі шегерілген.
"Бүгінде ішкі істер органдары 64 қылмыстық істі тергеп жатыр. Биыл Қылмыстық кодекстің ("алаяқтық" – автор) бабына сәйкес 4 іс тіркелді", – деді басқарма басшысы.
Дәурен Ерболат
