2026 жылдың қаңтар-қазан айларында "Қазақстан темір жолы" ҰК" АҚ желісі бойынша 2,4 млн тонна ұн өнімдері тасымалданды, деп хабарлайды inbusiness.kz сайты.
Бұл өткен жылдың сәйкес кезеңімен салыстырғанда 7%-ға көп. Оның ішінде экспортқа 2 млн тонна жөнелтілді. Бұл көрсеткіш бір жылда 19%-ға өскен. Орталық Азия елдеріне 734 мың тонна өнім жеткізілген, өсім – 13%.
Қытайға құрама жем экспорты да артты. Он айда бұл көрсеткіш 32%-ға өсіп, 3,4 млн тоннаға жетті. Оның ішінде контейнерлермен 3,1 млн тонна (+28%), жабық вагондармен 286 мың тонна тасымалданған. Соңғы көрсеткіш өткен жылмен салыстырғанда екі есе көп.
Биылғы егін жинау маусымы басталғалы бері тасымал көлемі одан әрі ұлғайған. Тамыз-қазан айларында 774 мың тонна ұн өнімі тасымалданып, өсім 10%-ды құрады. Оның ішінде 652 мың тоннасы экспортқа жөнелтілген. Ал Қытайға 1,1 млн тонна құрама жем жеткізіліп, көрсеткіш 13%-ға өскен.
Көкөніс, оның ішінде картоп тасымалы 53%-ға артып, 478 мың тоннаны құрады. Оның 463 мың тоннасы экспортқа жөнелтілген. Өнімнің негізгі бөлігі Өзбекстанға жеткізілді. Көрші елге 349 мың тонна (+52%) өнім жөнелтілсе, Тәжікстанға 54 мың тонна жеткізілген. Бұл шамамен төрт есе өсімді көрсетеді.
ҚТЖ жүк жөнелтушілермен, вагон операторларымен және көршілес теміржол әкімшіліктерімен бірлесіп, азық-түлік жүктерін тасымалдауды ұйымдастыру жұмыстарын жалғастырады.
