Қазақстанның екінші, әлемнің 77-ракеткасы Юлия Путинцева Париж (Франция) WTA 125 турнирін сәтті бастады, деп хабарлайды inbusiness.kz сайты.
Қазақстандық теннисші бастапқы кездесуін әлемнің 50-інші, осы жарыстың 6-ракеткасы, америкалық Маккартни Кесслермен өткізді.
Қарсыластар осыған дейін өзара бір рет кездесіп, онда Путинцева жеңіске жеткен еді. Бұл жолы Юлия қарсыласына еш мүмкіндік қалдырмады — 6:1, 6:1.
Бір сағат 8 минутқа созылған бәсекеде Путинцева 10 брейк-пойнттың алтауын мүлт жібермеді. Кесслер 1 брейкпен (7 брейк-пойнт) шектелді.
Юлия Путинцева ширек финалға шығу үшін әлемнің 362-ракеткасы, америкалық Слоан Стивенс немесе іріктеу сайысы жеңімпаздарының бірімен таласады.
Парижде Ролан Гаррос турнирі қарсаңында 11-17 мамыр аралығында өтіп жатқан аталмыш доданың жүлде қоры 115 мың АҚШ долларына бағаланған.
