Жыл басынан бері Шығыс Қазақстан облысында абаттандыру және қоршаған ортаны қорғау талаптарын бұзудың 7 мыңнан астам дерегі анықталды, деп хабарлайды inbusiness.kz сайты.
Полиция бұл бағыттағы жұмысты жергілікті атқарушы органдар және басқа да мемлекеттік қызметтермен бірлесіп жүргізіп жатыр. Учаскелік инспекторлар тұрғындармен кездесіп, заң талаптары мен оларды бұзғаны үшін жауапкершілік туралы түсіндіру жұмыстарын жүргізуде.
Жиі кездесетін заң бұзушылықтардың қатарында қоқысты заңсыз төгу, аумақтарды ластау, рұқсатсыз жазулар салу және инфрақұрылым нысандарын бүлдіру бар.
Сонымен қатар тұрғындар кездесулер барысында аулалар, көшелер мен қоғамдық орындардағы мәселелерді көтереді. Полиция тиісті мемлекеттік органдармен бірлесіп, айтылған мәселелерді қарап, қажетті шараларды қабылдайды.
Полицияның мәліметінше, профилактикалық жұмыстар құқық бұзушылықтарды анықтаумен қатар, олардың алдын алуға да мүмкіндік береді.
