2026 жылғы 26 қаңтарда өткен Конституциялық комиссияның үшінші отырысында Мәжіліс депутаты Айдарбек Қожаназаров конституциялық өзгерістердің ел дамуы үшін стратегиялық маңызын атап өтті, деп хабарлайды inbusiness.kz сайты.
"Respublica" партиясы атынан сөз сөйлеген депутат ұсынылып отырған реформаларды толық қолдайтынын мәлімдеді.
Оның айтуынша, мемлекеттік институттарды нығайту, құқық үстемдігін қамтамасыз ету және нормативтік жүйенің айқын болуы басқару тиімділігін арттырып, билік тұрақтылығын күшейтеді.
– Экономика тек институттары берік, заң үстемдігі орнаған және басқару мәдениеті нақты ережелер мен рәсімдерге сүйенген жағдайда дамиды, – деді Айдарбек Қожаназаров.
Депутат 2019 жылдан бері Қазақстанда институционалдық жаңғыруға бағытталған кешенді өзгерістер жүргізіліп келе жатқанын еске салды. Осы уақыт ішінде саяси жүйе жаңартылып, азаматтардың саяси процестерге қатысу мүмкіндігі кеңейгенін, партиялар мен азаматтық қоғамның рөлі артқанын атап өтті.
– Конституциялық реформа – бұл ел дамуының логикалық жалғасы. Оның негізділігі мемлекеттік жүйедегі сенімнің, жауапкершіліктің және тиімділіктің артуынан көрініс табады, – деді ол.
Сондай-ақ Қожаназаров қоғамдық диалог пен Халық кеңесі тетігінің маңызын ерекше атап өтті. Оның пікірінше, бұл құралдар азаматтар мен билік арасындағы тұрақты байланысты қамтамасыз етеді.
– Реформа жас буынға бағытталған. Ол экономиканы, кәсіпкерлікті және әлеуметтік инфрақұрылымды дамытуға нақты жағдай жасайды. Әр азаматтың елдегі өзгерістерге қатысып, маңызды шешімдерге ықпал ету мүмкіндігі бар. Әділетті Қазақстанды құру – баршамыздың ортақ міндетіміз, – деп түйіндеді депутат.
