Оның айтуынша, 7 ақпанда таңертең Щучинсктен Нұр-Сұлтан қаласы бағытындағы жолда, елордадан Көкшетау, Қостанай бағытына қарай шыға берісте 800-ден аса жеңіл және жүк көлігі жолда тұрып қалды.
"Сағат 13.15-те Щучинск бағытында 300-ге жуық көліктен тұратын колонна полиция қызметкерлерінің ілесуімен жолға шықты.
Сондай-ақ 500 көліктен тұратын колонна полицейлердің көмегімен Нұр-Сұлтаннан жолға шықты", - дейді Талғат Уәли.
Ресми өкіл сағат 15.30-да Щучинск және Нұр-Сұлтанда автокөліктердің кіруіне тыйым салынғанын атап өтті.
"Қазіргі таңда Қостанай облысындағы жолда көлік кептелісі жоқ", - деді ол.
Айта кетейік, 6 ақпанда ауа райының қолайсыздығына байланысты еліміздің 8 өңірінде: Нұр-Сұлтан, Солтүстік Қазақстан, Ақмола, Қостанай, Павлодар, Қарағанды, Қызылорда, Шығыс Қазақстан облыстарында жолдар жабылған еді.
