АҚШ-тың бірқатар штаты Android қосымшалар дүкенін бақылауға алғаны үшін Google-ді сотқа бермек, деп хабарлайды Inbusiness.kz Politico басылымына сілтеме жасап.
Бұл іске 36 штат қосылды. Олардың қатарында Юта, Солтүстік Каролина, Теннесси, Нью-Йорк, Аризона, Колорадо, Айова, Небраска штаттары және Вашингтон бар (Колумбия округі). Олар Google монополияға қарсы заңнаманы бұзды деп айыптады. Мұндай арыз осымен үшінші мәрте жіберіліп отыр.
Өткен жылы АҚШ-тың әділет министрлігі және оны қолдаған бірнеше штат Google-ді іздеу жарнамасындағы үстемдігін асыра пайдаланғаны үшін сотқа берген еді. Кейінгі сот ісінде Техас бастаған штаттар тобы компанияның интернет ортадағы бәсекелестікке қарсы әрекетін сынаған болатын.
Сонымен қатар Google-ді Еуропалық Одақтың монополияға қарсы органдары да тексермек. Олар компанияның сандық жарнама саласындағы бизнесіне қатысты ресми тергеуді бастайды.
Табиғат Нұрболат
