АҚШ Орталық барлау басқармасының бұрынғы қызметкері, ел тарихындағы ең қауіпті қос агенттердің бірі саналған Олдрич Эймс Мэриленд штатының Камберленд қаласындағы түзеу мекемесінде қайтыс болды.
CBS телеарнасының мәліметінше, Эймс 84 жасында өмірден өткен. Ол 1994 жылғы 28 сәуірден бері шартты түрде мерзімінен бұрын босату құқығынсыз өмір бойына бас бостандығынан айыру жазасын өтеп келген. Тергеу деректеріне сәйкес, Эймс ұзақ жылдар бойы құпия ақпаратты әуелі Кеңес Одағына, кейін Ресейге сатып отырған.
Айыптау материалдарында оның әрекеттері салдарынан 100-ден астам барлау операциясы әшкереленіп, Батысқа жұмыс істеген 30-дан аса агенттің жеке басы анықталғаны көрсетілген. Соның нәтижесінде кемінде 10 агент қаза тапқан.
Қос агент ретінде шамамен тоғыз жыл қызмет еткен кезеңде Эймс КСРО Мемлекеттік қауіпсіздік комитетінде "Колокол" жедел бүркеншік атымен белгілі болған. Ол Кеңес Одағында жұмыс істеген АҚШ барлау агенттерінің басым бөлігін әшкерелеп, кейбірі ең жоғары жазаға кесілген.
1985 жылдың сәуірінде алғашқы әшкереленген агенттердің тізімі үшін Эймс 50 мың АҚШ долларын алған. Ал кеңестік және кейін ресейлік арнайы қызметтермен көпжылдық ынтымақтастығы үшін оған жалпы сомасы шамамен 2,5 млн доллар төленген.
1983 жылы Эймс АҚШ-қа қайта оралып, КСРО аумағындағы операцияларды бақылаумен айналысқан ЦРУ бөлімшесін басқарды. Осы қызметі арқылы ол аса ауқымды құпия ақпаратқа қол жеткізген.
Ол 1994 жылғы 21 ақпанда тұтқындалған. Бұған дейін бір жыл бойы ЦРУ ішінде "ішкі тыңшыны" анықтау мақсатында күшейтілген тексеру мен қарсыбарлау шаралары жүргізілген еді.
