Ақтау портында су түбін тереңдету бойынша негізгі жұмыстар басталды, деп хабарлайды inbusiness.kz сайты.
Жоба порт инфрақұрылымының тұрақты жұмысын қамтамасыз етіп, Транскаспий халықаралық көлік бағыты (ТХКБ) бойынша тасымал тиімділігін арттыруға бағытталған.
Жұмыстар Каспий теңізі деңгейінің төмендеуіне байланысты қолға алынды. Жоба аясында шамамен 1,3 млн текше метр топырақ алынып, порт акваториясының тереңдігін 6–7 метрге дейін ұлғайту көзделген.
Бұл порттың өткізу қабілетін арттырып, ТХКБ бойынша тасымал көлемін 30%-ға дейін ұлғайтуға және теңіз арқылы жүк тасымалдау құнын шамамен 10–15%-ға төмендетуге мүмкіндік береді. Сонымен қатар жоба теңізде жүзу қауіпсіздігін қамтамасыз етуге және порт инфрақұрылымына инвестиция тартуға ықпал етеді.
Мердігер жұмыс кестесін әзірлеген. Жоба белгіленген мерзімге сәйкес жүзеге асырылып жатыр. Су түбін тереңдету жұмыстарын биылғы жылдың соңына дейін аяқтау жоспарланған.
