"ҚазМұнайГаз-Аэро" ЖШС Ақтөбе халықаралық әуежайындағы арнайы техника паркі жаңа заманауи жанармай құю автокөлігімен толықты, деп жазады inbusiness.kz сайты.
Өңірлердегі әуе айлақтарының инфрақұрылымын жаңғырту Мемлекет басшысы Қасым-Жомарт Тоқаевтың еліміздің әуежайларын заманауи халықаралық авиациялық хабқа айналдыру жөніндегі тапсырмасын орындау аясында жүргізіліп жатыр.
"Өндіруші компания мамандандырылған автокөлікті Қазақстанның климаттық ерекшеліктерін ескере отырып, арнайы техникалық тапсырма бойынша жасаған. ҚМГ-Аэро сарапшыларының ұсыныстарын негізге алып, енгізілген инженерлік шешімдер ауа температурасы -45 °C дейін аязда да сүзу тораптары мен отын беру жүйелерінің тұрақты әрі қауіпсіз жұмысын қамтамасыз етеді", – делінген хабарламада.
"Қазақстанның авиациялық әкімшілігі" АҚ тарапынан барлық қажетті рұқсат беру рәсімдері аяқталғаннан кейін техника рейстерге тұрақты қызмет көрсетіп, әуе кемелеріне жанармай құю үшін қолданылады.
