Ақтөбе облысының Әйтеке би, Қобда, Ойыл, Шалқар аудандарында "Мал ұрлығы" жедел-алдын алу іс-шарасы өтіп жатыр. Өңірде аталған аудандарда қылмыстың бұл түрі жиі тіркеледі, – деп жазды inbusiness тілшісі.
Осылайша, 24-30 маусым аралығында полиция қызметкерлері мал ұрлығының екі дерегін анықтаған. Сондай-ақ, осы аралықта мал және ет өнімдерін тасымалдаған 14 автокөлік, мал және ет өнімдерін сататын 6 орын, шаруа қожалықтары, мал бағу нүктелері мен фермалар тексеріліп, тиісті құжаттарсыз мал мен ет өнімдерін тасымалдаған 3 дерек әшкере болады.
"Анықталған заң бұзушылықтар бойынша ҚР әкімшілік құқық бұзушылық кодексінің 406 "Қазақстан Республикасының ветеринария саласындағы заңнамасын бұзу" бабы бойынша әкімшілік хаттамалар жасау үшін ветеринарлық қызметке материалдар жолданды", – деп хабарлайды ПД баспасөз қызметінен.
Сонымен қатар, ауылдық учаскелік полиция инспекторлары үй малының қараусыз жайылып жүрген 14 дерегін тіркеген. Олар бойынша 176 бас мал арнайы қораларға қамалған.
Құралай Қуатова
