Ақтөбе қаласында қауіпті мұнай қалдықтарын заңсыз қайта өңдеп, миллиондаған кіріс тапқан кәсіпорын басшысы қылмыстық жауапкершілікке тартылды. Сот үкімімен оның мүлкі тәркіленіп, заңсыз тапқан 393 миллион теңгесі мемлекет кірісіне өндірілді, деп хабарлайды inbusiness.kz сайты.
Бас прокуратураның хабарлауынша, табиғатты қорғау прокуратурасының тексеруі барысында "ЖАН-АМИ и К" ЖШС директорының 2024–2025 жылдары тиісті мемлекеттік лицензиясыз 1400 тоннадан астам қауіпті мұнай қалдығын өңдеумен айналысқаны анықталды. Нәтижесінде серіктестік 393 млн теңге табыс тапқан.
Экономикалық тергеп-тексеру департаменті жүргізген іс аясында Ақтөбе қаласының соты кәсіпорын директорын Қылмыстық кодекстің 214-бабы (Заңсыз кәсіпкерлік) бойынша кінәлі деп таныды.
Сот оған мүлкін тәркілей отырып, 2 жыл 6 ай мерзімге бас бостандығын шектеу жазасын тағайындады.
Дегенмен, Қазақстан Республикасының "Рақымшылық туралы" Заңы негізінде сотталған адам негізгі жазадан босатылды. Алайда заңсыз жолмен тапқан 393 млн теңге табысы толығымен мемлекет кірісіне алынды.
Апелляциялық саты бұл үкімді өзгеріссіз қалдырып, шешім заңды күшіне енді.
