2026 жылғы жазғы туристік маусымда қазақстандықтар үшін Алакөл көлі жағалауында демалу бұрынғыдан да қолжетімді бола түсті, деп хабарлайды inbusiness.kz сайты.
Бұған әуе қатынасының дамуы мен Астанадан тікелей рейстерді қамтитын жаңа туристік бағдарламалардың іске қосылуы ықпал етті.
Қазір туристер әуе билеті мен қонақүйде тұруды қамтитын дайын туристік пакеттерді сатып ала алады. Бұл демалысты жоспарлауды жеңілдетіп, қызметтердің толық топтамасын пайдалануға мүмкіндік береді.
Мамандардың айтуынша, ұйымдастырылған туризмді дамыту ішкі туризмнің қолжетімділігін арттырудағы маңызды бағыттардың бірі болып саналады.
Соңғы жылдары Алакөл жағалауында инфрақұрылымды жаңғырту жұмыстары қарқын алған. Жағалауды абаттандыру, инженерлік желілерді дамыту және туристерге қолайлы жағдай жасау бағытындағы жобалар 2026–2029 жылдарға арналған курортты өңірлерді дамыту жөніндегі жол картасы аясында жүзеге асырылуда.
Әуе қатынасының кеңеюі мен мемлекеттік қолдау шараларының нәтижесінде Қазақстандағы танымал туристік бағыттарға сапар шегу барған сайын ыңғайлы әрі қолжетімді болып келеді.
