Алматы онкологиялық орталығында заманауи роботтандырылған технологиялар енгізілді. Оларды Денсаулық сақтау министрі Ақмарал Әлназароваға таныстырды, деп хабарлайды inbusiness.kz сайты.
Роботтандырылған хирургиялық жүйе күрделі аз инвазивті операцияларды өте кішкентай тіліктер арқылы жасауға мүмкіндік береді. Мамандардың айтуынша, технология операцияның дәлдігін арттырып, қан тамырларының зақымдану, асқыну және инфекция қаупін азайтуға мүмкіндік береді. Сондай-ақ операциядан кейін пациенттің стационарда жату мерзімі қысқарып, қалыпты өмірге тезірек оралуына жағдай жасалады.
Робот хирургке операциялық алаңды үш өлшемді әрі бірнеше есе үлкейтілген форматта көруге мүмкіндік береді. Жүйе қозғалыстың жоғары дәлдігін қамтамасыз етіп, қолдың дірілін жояды.
Бұдан бөлек, орталықта роботтандырылған дәріхана кешені мен дәрілік препараттарды жабық жағдайда дайындау жүйесі таныстырылды. Технология дәрі-дәрмекті қабылдау, сақтау, дайындау және пациентке беруге дейінгі процестерді автоматтандырады. Әр препаратқа жеке цифрлық сәйкестендіру нөмірі беріліп, оның қозғалысын бақылауға мүмкіндік бар.
"Роботтандырылған технологиялар жекелеген процестерді жай ғана автоматтандырумен шектелмейді. Олар хирургиялық араласулардың дәлдігін, дәрі-дәрмекпен қамтамасыз етудің қауіпсіздігін және емдеудің әрбір кезеңіндегі бақылауды арттыруға мүмкіндік береді. Бұл – ең алдымен пациенттің қауіпсіздігі мен мүддесіне бағытталған технологиялар", – деді Алматы қаласы Қоғамдық денсаулық сақтау басқармасының басшысы Марат Пашимов.
Қазір Алматыда онкологиялық аурулары бар 38 мыңнан астам адам диспансерлік есепте тұр. Жыл сайын 27 мыңнан астам адам медициналық көмек алады. Соңғы сегіз жылда көрсетілетін емдеу қызметтерінің көлемі 2,5 есеге артқан.
Сонымен қатар бес жылдық өмір сүру көрсеткіші 46%-дан 75%-ға дейін өскен.
