Мониторинг жұмыстарына "Қазселденқорғау" мамандары, Алматы қаласы әкімдігі мен Төтенше жағдайлар департаментінің өкілдері, сондай-ақ "Қазавиақұтқару" АҚ-ның Ми-8 АМТ тікұшағы жұмылдырылды.
Тексеру Іле Алатауы жотасының солтүстік бөлігі – Қаскелең өзені алабынан бастап Түрген өзені алабына дейінгі аумақты қамтыды.
Негізгі мақсат мұздақ көлдер мен мұздық кешендердің жағдайын, сел арналарының ахуалын және жалпы гидрологиялық қауіп деңгейін бағалау болды.
Мамандардың мәліметінше, биік таулы аймақтағы мұздақ көлдердің басым бөлігі маусымдық толу кезеңінде. Кейбір көлдер әлі де мұз бен қар жамылғысының астында сақталған. Ал өзендерде су лайлылығының артуы тіркелмеген.
Қар жамылғысының қалыңдығы таулы аумақтарда 20-50 сантиметр аралығында. Қар сызығы теңіз деңгейінен 3300-3500 метр биіктікте орналасқан.
Тексеру нәтижесі бойынша Алматы қаласы мен Алматы облысындағы өзен алаптарында сел жағдайы тұрақты деп бағаланды.
