2026 жылғы 1-29 маусым аралығында Алматыда жылжымалы экологиялық зертханалар 778 автокөліктің пайдаланылған газдары мен түтін деңгейінің белгіленген нормаларға сәйкестігін тексерді, деп хабарлайды inbusiness.kz сайты.
Бұл туралы "Eco Almaty" ЖШС өкілдері мәлім етті.
Мониторинг қала Полиция департаментімен бірлесіп жүргізілді. Іс-шаралар Алматының атмосфералық ауаны қорғау қағидаларын іске асыру аясында ұйымдастырылып, ауа сапасын жақсартуға және зиянды шығарындыларды азайтуға бағытталды.
Тексеру қорытындысы бойынша 194 көліктен экологиялық талаптардың бұзылғаны анықталды. Оның ішінде 106-сы бензинмен, 86-сы дизельмен, 2-і газбен жүретін көлік.
"Eco Almaty" ЖШС мәліметінше, мұндай рейдтік тексерулер тұрақты түрде өткізіліп келеді және қала ауасындағы зиянды шығарындыларды азайтуға бағытталған кешенді шаралардың бір бөлігі болып табылады. Қазіргі уақытта жылжымалы экологиялық зертханалардың жұмысы жалғасуда.
