Алматыда алкоголь өнімдерін заңсыз сату деректерін анықтау мақсатында рейдтік іс-шаралар жүргізілді, деп хабарлайды inbusiness.kz сайты.
Профилактикалық шараларды полиция мен мемлекеттік кірістер департаментінің қызметкерлері бірлесіп өткізді.
Екі күн ішінде 300-ден астам нысан, оның ішінде азық-түлік дүкендері мен ойын-сауық орындары тексерілді. Нәтижесінде алкоголь өнімдерін тиісті лицензиясыз сатқан 17 жеке кәсіпкер анықталды. Оларға қатысты ҚР Әкімшілік құқық бұзушылық туралы кодексінің 463-бабы бойынша әкімшілік материалдар толтырылды. Заңсыз айналымнан 500 литрден астам алкоголь өнімі тәркіленді.
Бұдан бөлек, алкоголь сату кезінде заңнама талаптарын бұзған тағы 12 кәсіпкер ӘҚБтК-нің 200-бабы бойынша әкімшілік жауапкершілікке тартылды.
Полиция мұндай рейдтер жүйелі түрде жалғасатынын атап өтті. Негізгі мақсат – алкоголь өнімдерінің заңсыз айналымына тосқауыл қойып, құқық бұзушылықтардың алдын алу.
