Алматыда "Жасыл ел" жобасы бойынша 2000-нан аса жас жұмысқа орналасады

Мегаполистің "Жасыл ел" жасағының қатарындағы белсенділер саны жылдан жылға көбейіп келеді. 

Алматыда "Жасыл ел" жобасы бойынша 2000-нан аса жас жұмысқа орналасады Фото: Жаңа кезең

Өткен жылы уақытша маусымдық жұмыспен 14 пен 35 жас аралығындағы 1900 жас қамтылды. Бұл туралы Алматы қалысының Өңірлік коммуникациялар қызметінде "Жасыл ел" жобасының жетекшісі Зухра Иманбаева мен "Жасыл ел" жобасының экосақшысы Мұратхан Тауасар айтты. 

"Жасыл ел" – мектеп оқушылары, студент және жұмыссыз жастарды маусымдық жұмысқа орналастыруға, республика бойынша орман алқаптарын құруға, сол арқылы Қазақстанның экологиялық жағдайын жақсартуға бағытталған жоба. Ол Алматы қалалық Жастар саясаты мәселелері басқармасының қолдауымен жүзеге асырылады.

"Әлемдегі жаһандық экологиялық жағдай күрделене түсуде, қоршаған ортаны қорғау мәселесі өзекті болып отыр. Өткен жылдың қарашасында Мемлекет басшысы Қасым-Жомарт Тоқаев алматылықтармен кездесуінде: "Қоршаған орта азаматтардың денсаулығы мен өмір сүру ұзақтығына тікелей әсер етеді. Сондықтан экология мәселесі әрқашан менің назарымда". Сондай-ақ "Алматы қаласын 2025 жылға дейін дамыту бағдарламасы және 2030 жылға дейінгі орта мерзімді перспективалар" бекітілді. Оның басты көрсеткіштерінің бірі – жыл сайын кемінде 10 000 жасты жұмыспен қамту көзделген", - деді Зухра Иманбаева.

Спикерлердің айтуынша, "Жасыл ел" жасағындағылар қаланы көгалдандырудан бөлек, экологиялық семинарлар мен тренингтерге, қалалық және республикалық сенбіліктер мен балалар үйі, қарттар үйі, ардагерлер үйлеріндегі эко акцияларға белсенді қатысады. 

"Жобаның қатысушылар үшін берер артықшылықтары мол. Жастар бір-бірімен танысып, қаланың дамуына үлестерін қосады", -деп атап өтті Мұратхан Тауасар. 

Сонымен қатар, жасақта эко патрульдер құрылуда, олар қала аумағында рейдтер жүргізіп, экологиялық бұзушылық фактілерін анықтайды.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу
Telegram арнамызға жазылыңыз! Жаңалықтар туралы бірінші біліңіз
Жазылу