Геология комитетінің төрағасы Талғат Сатиев алтын кен орындарының негізгі қоры қай өңірлерде орналасқанын айтты, деп хабарлайды inbusiness.kz тілшісі.
Басшының айтуынша, Қазақстанда пайдалы қазбалардың мемлекеттік балансында 8 711 кен орны бар.
"Оның ішінде көмірсутектер бойынша – 317, қатты пайдалы қазбалар бойынша – 910, кең таралған пайдалы қазбалар бойынша – 3 160 және 4 324 жерасты суларының кен орны", – деді төраға ОКҚ-де өткен баспасөз мәслихатында.
Талғат Сатиев алтын кен орындарының негізгі қорына тоқталды.
"Алтын кен орындарының негізгі қоры – Шығыс Қазақстан облысында, бұл жалпы қордың – 36%, Ақмола облысында – 21%, Қарағанды облысында – 11%. Мыс қорының 82% елдің шығыс және орталық өңірлерінде шоғырланған. Қорғасын-мырыш кен орындарының Орталық Қазақстанда –41%, Шығыс Қазақстанда – 33%, Оңтүстік Қазақстанда – 21% ", – деді басшы.
Ол мұнайдың баланстық қоры (А+В+С1+С2 санаттары бойынша) – 4,4 млрд тонна, газдың – 2,1 трлн м3, конденсат – 416,2 млн тонна екенін атап өтті.
"Олардың басым бөлігі Атырау облысында – 75%, Маңғыстау облысында – 11% шоғырланған. Көмірсутек шикізаты қорының 68%: 3 ірі кен орнының үлесінде: Теңіз, Қашаған және Қарашығанақ", – деді Талғат Сатиев.
Төрағаның айтуынша, жалпы пайдалы қазбалар қорларын есепке алу 103 компонент бойынша жүргізіледі, оның ішінде көмірсутекті шикізат бойынша – 7, қатты пайдалы қазбалар бойынша – 61, кең таралған пайдалы қазбалар бойынша – 32, жер асты сулары бойынша – 3. Олардың ішінде алтын, мыс, қорғасын, мырышқа басымдық беріледі.
"Елдің минералдық-шикізат кешені Тәуелсіздік жылдарында нарық талаптарына толық бейімделген. 4000-нан аса кен орны жер қойнауын пайдалануға берілген, бүгінде ол мемлекетке пайда әкеліп, халықты жұмыспен қамтамасыз етіп отыр.
Дәурен Ерболат
