Назарбаев университетінде Сингапур Республикасының Аға министрі Ли Сянь Лунның елдің экономикалық даму тәжірибесіне, ұлттық бәсекеге қабілеттілікті нығайтуға және мемлекеттің қазіргі геосаяси сын-қатерлерге бейімделуіне арналған дәрісі өтті, деп жазады inbusiness.kz сайты.
Іс-шараға Назарбаев университетінің президенті Вакар Ахмад, Қазақстан Республикасының Ғылым және жоғары білім министрі Саясат Нұрбек, Қазақстан Республикасының Жасанды интеллект және цифрлық даму вице-министрі Бахтияр Мұхаметқалиев, сондай-ақ Қазақстан Республикасының Сингапур Республикасындағы Төтенше және Өкілетті Елшісі Асқар Құттықадам қатысты.
Дәріс барысында Ли Сянь Лун елеулі табиғи ресурстары жоқ шағын мемлекет – Сингапурдың бірнеше онжылдық ішінде орнықты әрі бәсекеге қабілетті экономика қалыптастырып, әлемдік экономикада елеулі орынға ие болған даму жолы туралы айтып берді.
Сингапур тәуелсіздік алғаннан кейін елдің экономикалық трансформациясын айқындаған негізгі шешімдер мен мемлекеттік шараларға ерекше назар аударылды. Олардың қатарында қолайлы бизнес ортасын қалыптастыру, өнеркәсіп пен қаржы секторын дамыту, инновацияларды қолдау, сондай-ақ инвестиция тартуға және адами капиталды дамытуға қолайлы жағдайларды жүйелі түрде қалыптастыру бар.
Қазіргі сын-қатерлер туралы айта келе, Аға министр Ли Сянь Лун мемлекеттік саясатты өзгеріп отырған жаһандық жағдайға үнемі бейімдеп отыру қажеттігін атап өтті. Оның айтуынша, экономикалық байланыстарды әртараптандыру, экономиканың орнықтылығын арттыру, жаңа құзыреттерді дамыту және инклюзивті өсуді қамтамасыз ету айрықша маңызға ие.
Кездесу барысында институционалдық даму мәселелеріне де ерекше назар аударылды. Ли Сянь Лун Сингапур моделін басқа елдерде механикалық түрде қайталау мүмкін еместігін атап өтті. Себебі бұл модель нақты тарихи, географиялық және институционалдық жағдайлардың нәтижесінде қалыптасқан.
Сонымен қатар Сингапурдың дамуының негізінде жатқан бірқатар қағидатты ұлттық ерекшеліктерді ескере отырып бейімдеуге болады. Олардың қатарында мемлекеттік басқарудың сапасы, ұзақ мерзімді стратегиялық жоспарлау, заң үстемдігі, технологияларды тиімді пайдалану және қолайлы экономикалық ынталандыру тетіктерін қалыптастыру бар.
Қонақ дәрісі тәжірибе алмасу, экономикалық даму, мемлекеттік басқару және халықаралық ынтымақтастықтың өзекті мәселелерін талқылау үшін маңызды алаңға айналды.
Іс-шараға қатысушылар Сингапурдың практикалық тәжірибесімен және елдің экономикалық трансформациясына әрі әлемдік экономикадағы позициясын нығайтуға ықпал еткен тәсілдерімен танысуға мүмкіндік алды.
