Денсаулық сақтау министрі Ақмарал Әлназарова елордада тұрғын үй қасбетінде кірпіш қаптамасының құлауы салдарынан көз жұмған фельдшер Ұлдана Мырзуан ісін тергеуге қатысты пікір айтты, деп хабарлайды inbusiness.kz сайты.
"Бұл оқиғада құрылыс нормалары мен ережелеріне қатысты көп сұрақ бар, яғни құрылыс кезінде тиісті талаптар ескерілмеген деген күмән айтылып жатыр", – деді Ақмарал Әлназарова Парламент Мәжілісінде тілшілер сұрағына жауап бере отырып.
Осы орайда аталған мәселе бойынша тергеу амалдары жалғасып жатқанын еске салды.
"Оқыған медициналық колледжінде дәрісханаға оның есімін беруді жоспарлап отырмыз", – деді ведомство басшысы.
Еске сала кетейік, 2025 жылдың 8 қарашасында елордада тұрғын үй кешенінің қасбетіндегі кірпіш қаптамасы мен кондиционер қондырғысының бөлігі құлап, салдарынан 5 адам зардап шекті. Ал 18 қараша күні жарақат алған фельдшер Ұлдана Мырзуан көз жұмды.
