Асылы Османға II дәрежелі "Барыс" ордені табысталды

Оған II дәрежелі "Барыс" ордені Мемлекет басшысы Қасым-Жомарт Тоқаевтың Жарлығымен берілді. Президент атынан орденді Алматы әкімі Дархан Сатыбалды табыстады.

Асылы Осман ұзақ жылдар бойы қазақ тілінің мәртебесін көтеруге, ұлттық құндылықтарды дәріптеуге және қоғамдық келісімді нығайтуға үлес қосып келеді. Ол Мемлекеттік тіл қауымдастығын басқарады. Ғалымның қаламынан 200-ден астам ғылыми және аударма мақала жарық көрген.

Мемлекет басшысы қоғам қайраткерінің мемлекеттік тілді дамытуға, елдегі тұрақтылық пен қоғамдық бірлікті нығайтуға сіңірген еңбегін жоғары бағалады.

Алматы әкімі Дархан Сатыбалды да Асылы Османның қаланың қоғамдық және мәдени өміріндегі айрықша орнын атап өтті.

БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында

Жазылу