"Атамекен" ҰКП қолма-қол ақша айырбастау пунктерінің жұмысына енгізілетін жаңа талаптарды қолдамайды. Себебі жарғылық капиталды 100 млн теңгеге дейін ұлғайту талабы айырбастау пунктерінің жаппай жабылуына себеп болуы ықтимал, деп хабарлайды Atameken Business.
Сондай-ақ, бәсекелестікті азайтып, валюта айырбастау нарығын монополизациялауға әкеп соғады. Ал, клиенттерден тұрғылықты мекенжайды сұрату – айтарлықтай қолайсыздық әкеледі және қауіпті болуы мүмкін. Мәміле кезінде құжаттарды тексеру – қызмет көрсету жылдамдығын төмендетуі мүмкін. Сондай-ақ, айырбастау пунктерінің жұмыс істеу уақыты таңғы сағат 10:00-ден 19:00-ге дейін болсын деген шектеу де азаматтарға қолайсыз. Осы жайттарды ескерген "Атамекен" қарастырылған шаралар Ұлттық банк көздеген нәтижені әкелмейді, бірақ нарықтың осы сегментінде еңбек ететін бизнеске кедергі келтіреді деп санайды.
