Оның ішінде бес темір жол және жеті автокөлік бағыты бар. Бұл еліміздің Еуразиядағы стратегиялық логистикалық хаб ретіндегі рөлін нығайта түседі, деп жазады inbusiness.kz сайты.
– Біз ірі халықаралық бағыттарды, соның ішінде Орта дәліз бен Солтүстік–Оңтүстік бағдарын қарқынды дамытып жатырмыз. Ақтау және Құрық порттары Каспий арқылы жүк тасымалдауда басты рөл атқарады. Былтыр Құрық портында жылына 1 млн тоннаға дейін жүк өңдеуге мүмкіндік беретін астық терминалы іске қосылды. Сондай-ақ Ақтауда жылына 240 мың контейнер өткізе алатын хаб салынды. Осы бағытта Акаба портының әлеуетін бірлесе пайдалануға дайынбыз, – деді Қасым-Жомарт Тоқаев.
Президент атом энергетикасының еліміз үшін стратегиялық маңызы бар екенін атап өтті.
– Қазақстан – уран өндіруде әлемдік көшбасшылардың бірі. Бізге жаһандық нарықтың шамамен 40 пайызы тиесілі. Иорданиядағы уран жобалары бойынша "Қазатомөнеркәсіп" пен JUMCO арасындағы келісім экономикалық ынтымақтастықты жаңа деңгейге көтереді, – деді Мемлекет басшысы.
Сонымен қатар Қасым-Жомарт Тоқаев агробизнес саласындағы әлеуетке тоқталды.
– Азық-түлік қауіпсіздігі жөніндегі Ислам ұйымының мүшелері ретінде бізді ортақ мақсат біріктіреді. Қазақстан егістік алқабы көлемі бойынша әлемде алтыншы орында. Жыл сайын сегіз млн тоннадан астам бидай мен екі млн тоннаға жуық ұнды әлемдік нарыққа жеткіземіз. Иорданияны жоғары сапалы, органикалық және экологиялық таза ауыл шаруашылығы өнімдерімен қамтамасыз ете аламыз. Aljazeera Agricultural компаниясының елімізде құс фабрикасын салу бастамасын құптаймыз. Бұл – агросаладағы ынтымақтастықты күшейтетін нақты қадам, – деді ол.
Сондай-ақ Президент медицина саласындағы әріптестіктің маңызын атап өтті.
– Иордания – әлемдегі жетекші медициналық орталықтардың бірі әрі дамыған фармацевтика саласына ие ел. Ол өз өнімдерін 85 мемлекетке экспорттайды. Қазақстан да дәрі-дәрмек пен медициналық жабдық өндірісін дамытып келеді. QazBioPharm мен иорданиялық DADvet компаниясының бірлескен түрде вакциналарды Таяу Шығыс пен Орталық Азияға экспорттау жоспарын қолдаймыз, – деді Қасым-Жомарт Тоқаев.
