Атырау облысы Махамбет ауданы Ортақшыл ауылындағы жеке үйдегі шөп қораның өртеніп жатқандығы жөнінде өрт сөндіру қызметіне 5 қазан күні кешкі 19:27 шамасында хабарланған. Кейін өрт сөндірушілер жанған қораның бір бұрышынан үш жас баланың мүрдесін тауып алады, деп жазды inbusiness.kz.
"Оқиға орнына №11 ӨСБ-нің өрт сөндірушілері 19 сағат 45 минутта жетіп, өрт 23 сағат 07 минутта толығымен сөндірілген. Алайда 6 қазан күні 00 сағат 02 минутта Махамбет аудандық полиция бөлімінен Ортақшыл ауылында үш кәмелет жасына толмаған балалардың белгісіз жағдайда жоғалғандығы туралы хабарлама келген. Іздестіру жұмыстарына ТЖД 11 қызметкері, 3 бірлік техникасы, 2 кинологиялық есебі, полиция департаменті қызметкерлері мен ауыл тұрғындары жұмылдырылған. Жоғалған 2014 жылғы екі бала мен 2012 жылғы бір баланың денесі өртенген шөптің арасынан табылды", - деп хабарлайды Атырау облысы ТЖД қоғаммен байланыс тобы.
Қазіргі күні табылған мүрделер полиция қызметкерлеріне тапсырылып, сот-медициналық сараптама тағайындалған.
Құралай Қуатова
