Атырау облыстық Полиция департаментінің мәліметінше, күдікті ретінде танылған 9-сынып оқушысы ұсталып, ата-анасымен бірге полиция бөліміне жеткізілген, деп жазады inbusiness.kz сайты.
Полицияның хабарлауынша, барлық процессуалдық әрекеттер оның заңды өкілдерінің қатысуымен жүргізіліп жатыр. Қазіргі уақытта оқиғаның мән-жайын анықтау үшін тиісті тергеу амалдары қолға алынған. Аталған дерек бойынша қылмыстық іс қозғалған. Сонымен қатар бала тәрбиесіне тиісті деңгейде көңіл бөлмеген ата-анасы да жауапкершілікке тартылуы мүмкін. Тергеу мүддесіне байланысты өзге ақпарат әзірге жарияланбайды.
Ал облыстық денсаулық сақтау басқармасы жарақат алған оқушының Атырау облыстық балалар ауруханасына жеткізілгенін хабарлады.
Дәрігерлердің айтуынша, науқастың жағдайы орташа ауырлықта, бірақ тұрақты. Ол медицина қызметкерлерінің тұрақты бақылауында және барлық қажетті медициналық көмекті алып жатыр. Емдеу жұмыстары қолданыстағы клиникалық хаттамаларға сәйкес жүргізілуде.
Еске салсақ, бұған дейін Атырауда оқушының қатарластарын балтамен қуалаған оқиғасы тіркеліп, аталған дерек бойынша да қылмыстық іс қозғалған болатын.
