Атырауда Тәуелсіз ғылыми-зерттеу орталығына қарасты арнайы теміржол полигоны бой көтерді, деп хабарлайды inbusiness.kz сайты.
Қазіргі уақытта тестілік режимде жұмыс істеп тұрған нысан сертификаттау рәсімдерінен толық өткен соң, жүк және жолаушылар вагондарын шетелге тасымай-ақ, ел ішінде қозғалыс жағдайында кешенді сынақтан өткізуге мүмкіндік береді.
Сынақтар бұған дейін Ресейдегі арнайы полигондарда жүргізіліп келген еді. Жаңа нысанның іске қосылуы теміржол саласындағы отандық кәсіпорындардың уақыты мен қаржысын едәуір үнемдеуге жол ашады.
Қазіргі таңда орталық базасында вагондардың алғашқы сынақ кезеңі жүзеге асырылып жатыр:
- Беріктік пен төзімділікті тексеру: Арнайы жабдықтар мен динамикалық 3D стендтің көмегімен вагондардың құрылымдық беріктігі, бөлшектерінің тозуға шыдамдылығы және пайдалану мерзіміне жарамдылығы бағалануда.
- Тетіктерді сынау: Сонымен бірге вагон арбаларының рамалары да зертханалық сынақтан өтіп жатыр.
Бұдан бөлек, орталықта биыл Астанада өткен халықаралық көрмеде таныстырылған жаңа үлгідегі вагон арбасы әзірленіп жатыр. Барлық тексерулер оң нәтиже беріп, техникалық талаптарға сәйкестігі расталса, бұл отандық өнім тікелей өндіріске енгізіледі.
Орталықтың бөлім басшысы Дмитрий Белоусовтың айтуынша, жаңа полигон сынақтың 2 кезеңін де бір жерде өткізуді қамтамасыз етеді.
"Орталықтағы қазіргі жұмыстар вагондарды сынақтан өткізудің алғашқы кезеңін қамтиды. Ал екінші кезеңде вагондар рельске қойылып, қозғалыс кезіндегі қауіпсіздігі мен техникалық көрсеткіштері бағаланады. Полигон толық қуатына көшкен соң, сынақтың қос кезеңін де Атыраудағы осы орталықта өткізе аламыз", – деді Дмитрий Белоусов.
