Қылмыстық іске негізгі күдікті сот санкциясымен 2 айға қамауға алынып отыр, деп хабарлайды inbusiness.kz сайты.
ІІМ баспасөз қызметінің ақпаратына сай, күдікті Сұлтан Сәрсемалиевке қатысты тергеу бұдан былай Қылмыстық кодекстің екі бабы бойынша жүргізіледі.
Оның біріншісі 99-баптың 2-бөлігі – "Екі немесе одан да көп адамды өлтіру" болса, екіншісі – "Алдын ала сөз байласу арқылы адамдар тобы жасаған ұрлық" (188-баптың 2-бөлігі).
– Атырау облыстық Полиция департаменті кісі өлтіру, сондай-ақ, олардың мүлкін ұрлау фактілері бойынша қылмыстық істі тергеп жатыр. Қылмыстық іс бойынша күдікті ұсталды және сот оған қатысты күзетпен ұстау түріндегі бұлтартпау шарасын санкциялады, – деп хабарлады ІІМ.
Еске салайық, Сұлтан Сәрсемалиев пен Ақбаян Мұқанғалиева Индонезия елінде ұсталды. Олардан марқұмдардың жеке куәліктері мен банк карталары тәркіленген болатын.
Күдікті кінәсін толық мойындаған. Ал оның экс-әйелі, 5 баланың анасы Ақбаян Мұқанғалиева психикалық денсаулық орталығында ем қабылдап жатыр.
Осыған дейін Атырау облысындағы әуелі жаппай жоғалып, кейін бәрі өлі табылған отбасы мүшелеріне қатысты қылмыстың басты себебі айтылған-ды.
