Атырау облысында салынып жатқан полиэтилен өндіру зауыты үшін ірі тоннажды жабдықтың алғашқы партиясы "өзен-теңіз" суларында жүзетін екі кемемен Қазақстанға жеткізілді, деп хабарлайды inbusiness.kz сайты.
Жүк құрамында өндіруші зауыттан шыққан пиролиз қондырғысына арналған 9 технологиялық жабдық бар. Партияның жалпы салмағы 12 мың тоннаға жуық, бұл шамамен 200 жүк тиелген теміржол вагонының салмағына тең.
Құрамында реакторлар, сепараторлар және бағаналар бар. Ең ірі жабдық – ұзындығы 43 метрден асатын, салмағы 347 тоннаны құрайтын дымқыл факел газының сепараторы (Wet Flare Knock Out Drum).
Жүкті түсіру жұмыстары аяқталды. Енді жабдық Атырау облысындағы "Ұлттық индустриялық мұнай-химия технопаркі" арнайы экономикалық аймағындағы құрылыс алаңына жеткізілмек.
Жылына 1,25 млн тонна полиэтилен өндіруге қауқарлы "Силлено" зауыты – Қазақстанның мұнай-газ химиясы саласындағы негізгі инвестициялық жобалардың бірі. Кешенді іске қосу 2029 жылға жоспарланып отыр.
