Ауыл шаруашылығы министрлігі субсидия алуға ауыл шаруашылығы тауарын өндірушілердің өтінімдерін беру кезінде туындаған Gosagro ақпараттық жүйесінің барлық кемшіліктерін түзеді, деп хабарлады ҚР Премьер-Министрінің орынбасары – Сауда және интеграция министрі Серік Жұманғарин сенаторлардың сұрауына жауап ретінде, деп хабарлайды inbusiness.kz.
Оның деректері бойынша, қазір жүйе штаттық режимде жұмыс істейді, 17,4 млрд теңге сомасына 5500-ден астам өтінім келіп түсті. Әкімдіктер 1,3 млрд теңге сомасына өтінімдерді мақұлдап үлгерген.
Субсидиялау шеңберінде қаржы институттарынан 4 млрд теңгеден астам сомаға өтінімдер түсті. Түркістан, Қарағанды, Атырау, Жамбыл, Солтүстік Қазақстан мен Ақмола облыстарының әкімдіктері ақпан айынан бастап ауыл шаруашылығы тауарын өндірушілерге сыйақы мөлшерлемелерін субсидиялау бойынша тиісті төлем жүргізеді.
