"Азық-түлік келісім шарт корпорациясы" ҰК" АҚ өз қызметін ҚР Ауыл шаруашылығы министрлігінің құрамында жалғастырады, деп хабарлады "ҚазАгро"-ның баспасөз қызметі.
Енді холдингтің құрылымында 3 арнайы қаржыландырушы компания қалатын болды:
- "Аграрлық несие корпорациясы" АҚ – АӨК субъектілерін несиелендіру, несие серіктестерін, микроқаржы ұйымдарын, екінші деңгейлі банктер мен лизингтік компанияларды қорландырумен айналысады.
- "Ауыл шаурашылығын қаржылай қолдау қоры" АҚ – шағын бизнесті микроқаржыландыру, қарыздарды кепілдендіру, АӨК сақтандыру жүйесіне қатысу.
- "ҚазАгроҚаржы" АҚ – ауыл шаруашылығы техникасы мен жабдықтарының лизингі.
Холдинг бұған дейін корпоративтік басқару сапасын арттыру мақсатында еншілес компаниялар санын қысқарту шеңберінде "ҚазАгроКепіл" АҚ-ны "Ауыл шаурашылығын қаржылай қолдау қоры" АҚ-ға қосу, "ҚазАгроӨнім" АҚ-ны "Аграрлық несие корпорациясы" АҚ-ға қосу және "Қазагромаркетинг" АҚ-ны тарату жұмыстарын жүргізген болатын.
Еске сала кетсек, өткен жылы "ҚазАгро" Холдингі сыртқы валюталық борыштарын толығымен өтеп, 2020 жылдың қорытындысы бойынша пайдаға шығу мақсатында трансформация бағдарламасын қабылдаған болатын.
