Биыл маусымнан тамызға дейінгі кезеңінде Алматы – Балқаш – Алматы бағыты бойынша тікелей әуе рейсі іске қосылады, деп хабарлайды inbusiness.kz сайты.
Ұшуларды аптасына бес рет SCAT Airlines әуе компаниясы орындайды. Бағытта 50 жолаушыға дейін сыятын CRJ 200 әуе кемелері пайдаланылады.
Сонымен қатар, осы кезеңде Астана – Балқаш – Астана бағыты бойынша күн сайынғы әуе қатынасы жолға қойылады. Тасымалдаушы ретінде Qazaq Air әуе компаниясы қызмет көрсетеді. Бұл бағытта 78-ден 86 жолаушыға дейін сыйымдылығы бар Bombardier Q-400 ұшақтары қолданылады.
Аталған екі бағыт та мемлекет тарапынан субсидияланады.
Жаңа әуе рейстерін іске қосу өңірдің көлік қолжетімділігін едәуір арттырып, Балқаштың туристік әлеуетін жандандыруға серпін береді. Бастама өңірге келушілер ағынын көбейтіп, инвестициялық тартымдылығын күшейтуге ықпал етеді.
