19 шілдеде, жексенбі күні Қазақстанда мобильді төлем жүйесі ресми түрде іске қосылады, деп жазады inbusiness.kz сайты.
Бұл жүйе арқылы қазақстандықтар енді:
- телефон нөмірі бойынша басқа банкке лезде ақша аудара алады;
- кез келген банктің QR-коды арқылы дүкенде төлем жасай алады;
- төлемдер тәулік бойы, нақты уақыт режимінде өтеді.
Кәсіпкерлер үшін де артықшылық бар: енді бірнеше терминал орнатудың қажеті жоқ, бір QR-код арқылы кез келген банктен төлем қабылдай алады. Жаңа жабдық сатып алудың да қажеті жоқ – бұрынғы терминалдарда-ақ жұмыс істейді.
Ұлттық банкі төрағасының орынбасары Бинур Мұратов Қазақстандағы қолма-қол ақшасыз төлем үлесі 90 пайыздан асатын болса, ТМД елдеріндегі ең көп көрсеткіш 60 пайызға ғана жететінін айтты.
"Елімізде қолма-қол ақшасыз экономика саласы соңғы бірнеше жылда ерекше қарқынмен дамып келеді. Соңғы 6-7 жылда қолма-қол ақшасыз экономика көлемі 100 еседен астам өсіп, жыл сайын шамамен 200 триллион теңгеге жетті. Сауда нүктелерінде қолма-қол ақшасыз төлемдердің қолжетімділігі де айтарлықтай артты", – деді Бинур Мұратұлы.
Жүйені пайдалану үшін азаматтарға өз банктерінің мобильді қосымшаларын жаңарту немесе қолдау қызметіне жүгіну ұсынылады.
