Бұл туралы Үкімет отырысына Ұлттық экономика министрі Әлібек Қуантыров айтты, деп жазады inbusiness.kz.
"Ауыл шаруашылығында шығарылған өнім 3,9%-ға ұлғайды. Саладағы өндірістің оң өсуі 16 өңірде тіркелді. Ең жоғарғы өсімді Шығыс Қазақстан, Маңғыстау, Ақмола және Қостанай облыстары көрсетті", – деді министр баяндамасында.
Осы орайда ведомство басшысы 7 экономикалық көрсеткіш бойынша өңірлер арасындағы жалпы жағдайға тоқталды.
Барлық көрсеткіштер бойынша оң өсім 6 өңірде – Абай, Батыс Қазақстан, Маңғыстау және Павлодар облыстарында, сондай-ақ Алматы және Шымкент қалаларында тіркелген.
"6 көрсеткіш бойынша өсім 9 өңірде тіркелді. Бұл Ақмола, Алматы, Атырау, Жамбыл, Қарағанды, Қостанай, Қызылорда, Солтүстік Қазақстан, Түркістан облыстары", – деді министр.
Бұл ретте министрлік экономикалық өсімді қамтамасыз ету мақсатында орталық және жергілікті атқарушы органдарға келесі шараларға назар аударуды ұсынды:
- Инфляцияға қарсы ден қою шараларын күшейту және жеміс көкөніс өнімдеріне бағаның алып-сатарлық маусымдық ауытқуына жол бермеу;
- Экономика салаларында өсудің оң қарқынын сақтау жөніндегі шараларды іске асыру, көктемгі-дала жұмыстарын жүргізуде кешенді қолдау көрсету;
- Жобалық-сметалық құжаттама мен техникалық-экономикалық негіздемені сапалы дайындау, сондай-ақ құрылыс-монтаждау жұмыстарын уақытылы жүргізу және бюджеттік бағдарламалар әкімшілерінің қаражатты өнім берушіге дейін жеткізуі;
- Шикізат емес экспортты жан-жақты қолдау және баламалы экспорттық бағыттарды ұлғайту;
- Су тасқынына қарсы іс-шараларды тиімді жүзеге асыру.
