Бүгін таңертең Батыс Қазақстан облыстық ТЖД-ның 112 пультіне полициядан Жаңақала ауданында 1971 жылы туған ер адамның жоғалғаны туралы хабарлама түскен.
"Алдын ала мәлімет бойынша ер адам 15 желтоқсанда мал суару үшін елді мекеннен шамамен 5 шақырым қашықтықта орналасқан құдыққа қарай шығып, қайта оралмаған. Өзімен бірге ұялы телефон болмаған", – деп жазылған хабарламада.
Іздеу жұмыстарына БҚО ТЖД күштері, ҚР ТЖМ 20982 әскери бөлімінің 2-құтқару батальоны, полиция қызметкерлері, жергілікті атқарушы органдардың өкілдері және жергілікті тұрғындар тартылды.
Іздеу жұмыстары үздіксіз жүргізілді. Сонымен қатар, әуеден барлау жүргізу үшін ҚР ТЖМ "Қазавиақұтқару" АҚ-ның МИ-8 тікұшағы жедел түрде жұмылдырылды.
Нәтижесінде, ер адам бастапқы іздеу аймағынан 30 шақырым қашықтықта, Ақжайық ауданына қарасты "Бахас" қыстауынан табылды.
Жағдайы қанағаттанарлық. Оған медициналық көмек қажет болмады.
