Microsoft корпорациясының негізін қалаушылардың бірі Билл Гейтс өткен аптада Моңғолияға барып, Баян-Өлгий, Дундговь және Дорнод аймақтарына сапар шекті, деп жазады inbusiness.kz сайты.
"Билл Гейтс Моңғолияға серіктерімен бірге келген. Қазіргі уақытта ол елдің батысындағы Баян-Өлгий аймағында жүр. Бекітілген маршрутқа сәйкес, миллиардер бұдан кейін орталықтағы Дундговь өңіріне және шығыстағы Дорнод аймағына баруды жоспарлап отыр", – деп жазды MongolianNews.
Әзірге Билл Гейтстің Моңғолияға сапарының нақты мақсаты мен оның қашан аяқталатыны туралы ақпарат жарияланған жоқ.
Миллиардер Моңғолияға өзінің флагмандық Gulfstream G650ER алыс қашықтыққа арналған бизнес-джетімен келген. Ұшақ N887GV тіркеу нөмірімен (сериялық нөмірі – 6357) Mente LLC компаниясының атына рәсімделген. Бұл компания Билл Гейтстің әуе паркін басқарады.
