Энергетика министрлігінің алқа отырысында ведомство басшысы Нұрлан Ноғаев осылай деді.
"Жаңартылатын энергетика нарығы жыл сайын қарқын алып келе жатыр.
Мәселен, былтыр 2018 жылмен салыстырғанда 77,8% өсіммен 2,4 млрд кВтсағ "жасыл" энергия өндірілді. Электр энергиясын өндірудің жалпы көлеміндегі жаңартылатын энергия көздерінің үлесі 2,3%-ға жетті. 2019 жылы жаңартылатын энергия көздерінің 21 нысаны пайдалануға берілді. ЖЭК жобалары бойынша тартылған инвестициялардың жалпы көлемі 613 млн АҚШ долларын құрайды. Жалпы қуаты 1050,1 МВт-ты құрайтын жаңартылатын энергия көздерінің 90 нысаны іске қосылды. 2020 жылы жалпы қуаты 605,5 МВт-ты құрайтын 18 ЖЭК нысанын енгізу жоспарлануда. 2020 жылдың қорытындысы бойынша ЖЭК өндіру жоспары шамамен 3 млрд кВт-сағатты құрайды", – деді министр.
Нұрлан Ноғаевтың айтуынша, 2019 жылы жиынтық қуаты 255 МВт құрайтын ЖЭК жобаларына арналған халықаралық аукциондық сауда-саттық электрондық форматта өткізілді. Оның нәтижесі бойынша 12 компания жиынтық қуаты 202 МВт-қа ЖЭК-ті қолдау жөніндегі қаржы-есеп айырысу орталығымен 15 жылға келісімшарт жасады.
Қанат Махамбет
