Бұл туралы Үкімет отырысында Президенттің ҚР Парламенті сессиясының ашылуында берген тапсырмаларын іске асыру барысын талқылау кезінде Еңбек және халықты әлеуметтік қорғау министрінің міндетін атқарушы Тамара Дүйсенова мәлім етті.
"Бірінші – ана мен баланы әлеуметтік қолдау. Биыл әлеуметтік төлемдер 2 миллионнан аса отбасыға беріледі, оған 1,2 триллион теңге қаржы жұмсалады", – деді спикер.
Осы орайда Тамара Дүйсенова бала күтімі бойынша жәрдемақыға тоқталды.
"Мемлекет басшысының тапсырмаларын орындау аясында үстіміздегі жылдың 1-ші қаңтарынан бастап бала күтімі бойынша әлеуметтік төлемдерді төлеу кезеңі бір жылдан бір жарым жылға дейін ұзартылды. Биылғы жылдың І тоқсанында оны алушылардың жалпы саны 435 мың адамнан асты. Оның ішінде 93 мың жұмыс істемейтін аналарымызға жәрдемақы республикалық бюджеттен, ал 343 мыңнан астам жұмыс істеген аналарға – Мемлекеттік әлеуметтік сақтандыру қорынан төленуде", – деді ведомство басшысы.
Мұндай төлемдерді биыл дүниеге келген және былтыр туған, бірақ жасы әлі 1-ге толмаған балалары бар 760 мың отбасы алады деп жоспарланған. Бұл мақсатқа 334,5 млрд теңге көзделген.
