2026 жылғы 1 қаңтардан бастап Бірыңғай жинақтаушы зейнетақы қорынан (Бірыңғай жинақтаушы зейнетақы қоры) төленетін зейнетақы төлемдері бұрыннан зейнетақы алып жүрген азаматтар үшін 5 пайызға ұлғаяды, деп жазады inbusiness.kz сайты.
Еске сала кетейік, БЖЗҚ-дан төленетін зейнетақы төлемдерінің мөлшері Қазақстан Республикасы Үкіметінің 2023 жылғы 30 маусымдағы қаулысымен бекітілген зейнетақы төлемдерін есептеу әдістемесіне сәйкес айқындалады.
Әдістемеге сәйкес, зейнетақы төлемдерін алғаш рет ала бастайтын азаматтар үшін ай сайынғы төлем көлемі зейнетақы жинақтарының сомасын 6,5 пайыздық төлем мөлшерлемесіне көбейтіп, алынған нәтижені 12 айға бөлу арқылы есептеледі.
БЖЗҚ-дан жүзеге асырылатын ай сайынғы зейнетақы төлемінің ең төменгі мөлшері тиісті қаржы жылына арналған республикалық бюджет туралы заңда белгіленген ең төменгі күнкөріс деңгейінің кемінде 70 пайызына тең. 2026 жылы ең төменгі күнкөріс деңгейі 50 851 теңге болып белгіленген. Ал ай сайынғы зейнетақы төлемінің ең жоғары мөлшері шектелмейді және ол азаматтың зейнетақы жинақтарының көлеміне тікелей байланысты.
Сонымен қатар әдістемеде жекелеген санаттағы азаматтар үшін зейнетақы төлемдерін есептеу барысында арттырушы түзету коэффициенттерін қолдану көзделген. Атап айтқанда, мерзімсіз уақытқа белгіленген I немесе II топтағы мүгедектігі бар адамдарға, сондай-ақ міндетті кәсіптік зейнетақы жарналары кемінде 60 ай төленген және зейнеткерлік жасқа жеткен азаматтарға осындай коэффициенттер қолданылады. Егер азамат аталған талаптардың екеуіне де бірдей сай келсе, ең жоғары мәнге ие түзету коэффициенті пайдаланылады.
Осылайша, зейнетақы төлемдерінің мөлшері тұрақты түрде аударылған зейнетақы жарналары мен жинақталған инвестициялық кіріс есебінен қалыптасатын зейнетақы жинақтарының көлеміне тікелей тәуелді. БЖЗҚ-дан төлемдер жеке зейнетақы шотындағы қаражат толық таусылғанға дейін жүзеге асырылады. Ал жеке зейнетақы жинақтары салымшының меншігі болып табылатындықтан, олар азаматтық заңнамада белгіленген тәртіппен мұраға қалдырылады.
