Маңғыстау облысының прокуратурасы пробация бақылауындағы және бас бостандығынан айыру орындарынан босатылған азаматтарды жұмыспен қамтуға қатысты заң бұзушылықтарды анықтады, деп хабарлайды inbusiness.kz сайты.
Мониторинг барысында облыс әкімдігінің жұмыс орындарын квоталау туралы қаулысымен жұмыс берушілер тізіміне күзет қызметін жүзеге асыратын ұйым енгізілгені белгілі болды. Алайда қолданыстағы заңнамаға сәйкес азаматтардың жекелеген санаттарына күзет саласында еңбек етуге шектеулер қарастырылған.
Прокуратураның мәліметінше, мұндай ұйымды тізімге енгізу жұмыспен қамту шараларының тиімділігін төмендетіп, жұмысқа орналасуға қатысты негізсіз үміт қалыптастырған.
Осыған байланысты облыс прокуратурасы әкімдік қаулысына наразылық енгізді. Нәтижесінде қадағалау органы актісі толық қанағаттандырылып, құжатқа тиісті өзгерістер енгізілді.
Прокуратураның араласуынан кейін нормативтік құқықтық акт заңнама талаптарына сәйкестендірілді.
