Рио-де-Жанейро қаласында өткен рейд кезінде кемінде 100-ден астам адам қаза тапқан, деп хабарлайды inbusiness.kz сайты.
Бразилия билігінің мәліметінше, операцияның басты мақсаты – елдің ең қауіпті есірткі картельдерінің бірі саналатын Comando Vermelho тобының ықпалын жою болған. Рейдке шамамен 2,5 мың полиция мен әскери қызметкер қатысып, брондалған көліктер мен тікұшақтар, сондай-ақ дрондар қолданылған.
Оқиға Рио-де-Жанейроның ең қауіпті аймақтарының бірі саналатын Penha және Complexo do Alemão фавелаларында болған.
Полицияның мәліметінше, операция барысында 115 күдікті және 4 полиция қызметкері қаза тапқан. Ал адам құқықтарын қорғаушылар мен жергілікті тұрғындар билік күш құрылымдарының әрекетін шектен тыс қатыгездік деп бағалап отыр.
Куәгерлердің айтуынша, атыс бірнеше сағатқа созылып, кейбір тұрғындар өз үйлерінде қамалып қалған. Әлеуметтік желілерде тараған бейнежазбаларда көшелерде оқ тескен көліктер мен қанға боялған денелер көрініс тапқан.
Бразилия Президенті Луис Инасиу Лула да Силва оқиғаға байланысты мәлімдеме жасап, адам шығынының көптігіне "терең алаңдаушылық білдірді". Ал Рио штатының губернаторы Клаудио Кастро операцияны "қажетті әрі сәтті өтті" деп қорғап, қаза тапқандардың барлығы "қарулы қылмыскерлер" деп мәлімдеді.
Бірақ құқық қорғаушылар бұл нұсқамен келіспейді. Amnesty International және БҰҰ-ның адам құқықтары жөніндегі басқармасы оқиғаға байланысты тәуелсіз тергеу жүргізуді талап етті. Олар полицияның бейбіт тұрғындарға да оқ атқан болуы мүмкін екенін айтады.
Бұл операция Бразилия тарихындағы ең қанды полиция рейді ретінде тіркеліп отыр. Бұған дейін де елдің бірнеше штатында есірткі саудасына қарсы операциялар кезінде адам шығыны жиі тіркелген, бірақ мұншалық ауқымды қақтығыс болмаған.
Қазір Рио-де-Жанейро көшелерінде тұрғындар билік әрекетіне қарсы наразылық акцияларын өткізіп, "зорлыққа қарсы бейбіт жолды" талап етуде.
