2021 жылы ауыл, орман және балық шаруашылығы саласындағы негізгі капиталға салынған инвестиция 773,2 млрд теңгеге жетіп, 2020 жылдың сәйкес кезеңімен салыстырғанда ақшалай мәнде 34,9%-ға және нақты мәнде 33,3%-ға арты, деп жазды inbusiness.kz тілшісі finprom.kz-ке сілтеме жасап.
Салаға салынған күрделі салымдардың жартысына жуығы үш облысқа тиесілі: Солтүстік Қазақстан (160,8 млрд теңге), Павлодар (103,3 млрд теңге) және Ақмола (101,4 млрд теңге) облыстары.
Агроөнеркәсіп кешен саласын қаржыландыру негізінен кәсіпорындардың жеке қаражаты есебінен жүзеге асырылады: 2021 жылы осы сегменттегі күрделі салымдардың көлемі 543 млрд теңгеге жетті. Бұл бір жыл бұрынғыдан 40,2%-ға артық. Келесі орында банктік емес қарыздар: 192,8 млрд теңге, бір жыл ішінде 31,4%-ға өсті. Банк несиелері 37,4 млрд теңгені құрады. Бұл бір жыл бұрынғыдан 4,2%-ға аз. Жергілікті бюджеттер – 2020 жылғы қаңтар-желтоқсанмен салыстырғанда 4 есе аз, небәрі 6,8 млн.
Бір қызығы, сыбайлас жемқорлыққа қарсы күрес мәселелеріне арналған кеңесте Қазақстан Республикасының Президенті Қасым-Жомарт Тоқаевтың өзі ауыл шаруашылығы саласын атап өтті. Мәселен, соңғы 5 жылда шаруаларды қолдауға 2 трлн теңгеден астам қаржы бөлінгенімен, саладағы жалпы сыбайлас жемқорлықтың кесірінен мемлекетке орасан зиян және азық-түлік қауіпсіздігіне нұқсан келді. Агроөнеркәсіптік кешен жылдан жылға сыбайлас жемқорлық мәселесі бойынша "көшбасшылар" қатарына еніп келеді.
Құралай Құдайберген
