Алматы - Екатеринбург және Қарағанды - Алматы тас жолына күкірт қышқылының төгілуіне қатысты Экология департаментінің тексеруі аяқталды.
Еске сала кетсек, 26 желтоқсанда Алматы - Екатеринбург тас жолының 912 шақырымынында "Maz" жүк көлігі аударылып, көліктегі 20 тонна күкірт қышқылының 8 тоннасы төгілген еді. Тғаы бір осындай оқиға 14 желтоқсанда Қарағанды – Алматы тас жолында орын алған болатын. Ол кезде 15 тонна күкірт қышқылы төгілді. Екі көлік те "Sary - Arka Copper Processing" ЖШС-ға тиесілі болған.
Қарағанды облысының Экология департаменті компанияға жоспардан тыс тексеру жүргізген.
"Қоршаған ортаны қорғау саласындағы уәкілетті органдарға ҚР Экологиялық кодексінің 199 бабының 10 - тармағына сәйкес, анықталған сәттен бастап екі сағат ішінде қоршаған ортаға ластаушы заттардың төгілуі туралы хабарламағаны үшін" "Sary- Arka Copper Processing" ЖШС-ға қатысты ҚР әкімшіліктік құқық бұзушылық туралы кодекстің 327-бабы бойынша 34 725 теңге көлемінде айыппұл салынды" , – деп мәлімдеді Қарағанды облысының Экология департаменті.
Бұдан өзге компания Қарағанды - Алматы тас жолына күкірт қышқылының төгілуіне байланысты 578 988 теңге көлемінде келген залалды өтейді. Сонымен қатар, Алматы – Екатеринбург тас жолында күкірт қышқылы төгілгенінен келген 272 122 теңге көлеміндегі шығынды да төлеуге міндеттелді.
Арайлым Еркебаева
