Желтоқсанда айырбастау пункттерінде сатылған доллардың нақты көлемі (сатылған сомадан сатып алынған қаржыны алғанда шыққан көрсеткіш) 378,4 млрд теңгені құрады, деп жазды inbusiness.kz тілшісі Бірінші кредиттік бюроға сілтеме жасап.
"Соңғы 4 жылда сұраныс бір-ақ рет бұл көрсеткіштен жоғары болды. 2019 жылы маусымда президент сайлауы кезінде, көрсеткіш 384,2 млрд теңгеге жетті. Сол кезде ұлттық валютаның әлсірейтіні туралы қауесет тараған еді", – деп жазылған бюро таратқан хабарламада.
2020 жылдың желтоқсанымен салыстырғанда сату көлемі 87,6%-ға өсті. 2019 жылдың желтоқсан бері сұраныс 76,6%-ға артты.
"Желтоқсандағы жалпы сұраныстың 60%-ға жуығы республикалық маңызы бар қалалардың үлесіне тиді. Алматыда таза сату көлемі бір айда 82,5 млрд теңгеден 109,1 млрд теңгеге дейін өсті. Нұр-Сұлтанда – 35,1 млрд теңгеден 47,5 млрд теңгеге дейін, Шымкентте – 61,2 млрд теңгеден 62,4 млрд теңгеге дейін. Сонымен қатар осы аймақтардың барлығында қараша айында сұраныстың күрт өскені байқалды", – деп жазылған хабарламада.
Оңтүстіктегі үш облыста – Алматы мен Жамбыл облыстарында, сондай-ақ Шымкентте долларға сұраныс 2018 жылдың басынан бері ең жоғары деңгейге жеткен. Түркістан облысында 2021 жылдың қарашасында сұраныс тарихи максимумға жақындаған.
2021 жылы қазақстандықтар долларды сатып алуға оны сатудан түскен ақшадан 2 трлн 36 млрд теңге артық жұмсаған. Бұл 2020 жылмен салыстырғанда 362,6 млрд теңгеге немесе 21,7%-ға артық. Орташа айлық мөлшерлеме бойынша халық осы уақыт ішінде 4,77 млрд доллар сатып алған. Бұл бір жыл бұрынғыдан 731 млн долларға немесе 18,1%-ға көп.
Құралай Құдайберген
