"Таза Қазақстан" бағдарламасы аясында Ішкі істер министрлігі ғимараттар мен қоғамдық орындарды бүлдіру, сондай-ақ заңсыз граффити салу фактілерінің алдын алу жұмыстарын күшейтті, деп хабарлайды inbusiness.kz сайты.
Соңғы екі күнде республика бойынша 524 профилактикалық іс-шара өткізіліп, граффити салудың 2 300-ден астам фактісі анықталды.
Тексеру барысында ғимараттар мен қоғамдық орындардағы мүлікті бүлдіруге қатысты 9 әкімшілік құқық бұзушылық тіркелді.
Ал Шымкентте есірткі құралдары, психотроптық заттар мен олардың аналогтарын насихаттау немесе заңсыз жарнамалау фактісі бойынша сотқа дейінгі тергеп-тексеру басталды.
Полиция құқық бұзушылықтарды анықтаумен қатар, профилактикалық түсіндіру жұмыстарын да жүргізіп жатыр. Республика бойынша 1 200-ге жуық ақпараттық брошюра таратылып, азаматтармен 976 түсіндіру әңгімесі өткізілді.
Заңсыз граффитидің жолын кесу жұмыстары Ішкі істер министрлігінің бақылауында жалғасып жатыр.
