Еске салсақ, бүгін 28 қарашада Екібастұзда жылу желілеріндегі апат салдарынан ТЖ режимі енгізілген болатын.
"Азаматтарға арналған үкімет" мемлекеттік корпорациясы қаладағы ТЖ жағдайға қарамастан, М.Жүсіп көшесі, 92/2 мекенжайы бойынша орналасқан Екібастұз қалалық ХҚКО жұмысын жалғастыру туралы шешім қабылдады.
"Бүгінде халыққа қызмет көрсету орталығы қысқартылған режимде жұмыс істейді. Өз үйлерінде оңтайлы температурасы бар орталықтың 8 қызметкері халыққа қызмет көрсету үшін жұмысқа шықты", - деді "Азаматтарға арналған үкімет" МК облыстық филиалының басшысы Асылбек Сапарбекұлы.
"Азаматтық қорғау туралы" ҚР Заңының 48-бабына сәйкес Екібастұз аумағында қала әкімі жылу желілеріндегі апат салдарынан жергілікті ауқымдағы техногендік сипаттағы төтенше жағдай жариялаған болатын. Төтенше жағдай режимі сол аймағында жөндеу-қалпына келтіру жұмыстары толық аяқталғанға дейін жалғасатын болады.
