Елімізде 525 мың адам мүгедектігі бойынша жәрдемақы алады

839

166 мың адамға асыраушысынан айырылғандығына байланысты жәрдемақы беріледі.

Елімізде 525 мың адам мүгедектігі бойынша жәрдемақы алады

2020 жылы қазақстандықтарға мүгедектікке байланысты және асыраушысынан айырылу жағдайы бойынша жәрдемақы түрінде 366 млрд теңгеден астам қаражат төленді, деп хабарлады ҚР Еңбек және халықты әлеуметтік қорғау министрлігінің 
баспасөз қызметі.

Министрлік берген ақпаратқа сүйенсек, 2020 жылғы қаңтар-желтоқсан айларында республикалық бюджеттен 366 млрд теңгеден астам қаражат, оның ішінде мүгедектігі бойынша мемлекеттік әлеуметтік жәрдемақы төлеуге – 291 млрд теңгеден астам қаражат, асыраушысынан айырылу жағдайына 75 млрд теңге төленген.

2021 жылғы 1 қаңтардағы жағдай бойынша мүгедектігі бойынша мемлекеттік әлеуметтік жәрдемақы алушылардың саны шамамен 525 мың адам, асыраушысынан айырылу жағдайы бойынша жәрдемақы алушылардың саны 166 мың адам болған.

Мүгедектігі бойынша мемлекеттік әлеуметтік жәрдемақылардың мөлшері мүгедектік тобына және себебіне, сондай-ақ тиісті қаржы жылына арналған "Республикалық бюджет туралы" заңда белгіленген ең төмен күнкөріс деңгейінің шамасына байланысты.

Мысалы, 2020 жылғы 1 сәуірден бастап жалпы аурудан болған I топтағы мүгедектік бойынша мемлекеттік әлеуметтік жәрдемақы мөлшері 62 723 теңге, II топқа – 49 983 теңге, III топқа – 33 975 теңге, 16 жасқа дейінгі мүгедек балаларға – 45 736 теңге болған.

Асыраушысынан айырылу жағдайы бойынша мемлекеттік әлеуметтік жәрдемақылардың мөлшері қайтыс болған (қаза тапқан) асыраушының асырауындағы адамдардың санына, қайтыс болу себебіне және ең төменгі күнкөріс деңгейіне байланысты.

Мысалы, 2020 жылғы 1 сәуірден бастап асырауындағы бір адамның асыраушысынан айырылу жағдайы бойынша мемлекеттік әлеуметтік жәрдемақы мөлшері 28 095 теңгені, асырауындағы екі адамның жәрдемақысы 48 676 теңгені құраған.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу